د مس عینک پروژې په اړه مجلس ترسره شو
د ریاستالوزراء اقتصادي مرستیال محترم ملا عبدالغني برادر اخوند د مس عینک پروژې د قراردادي شرکت له عمومي رییس سره نن د روان ۱۴۰۴ کال د ثور میاشتې په ۲۰مه نېټه په خپل کاري دفتر کې وکتل.
د ریاستالوزراء اقتصادي مرستیال مس عینک د افغانستان یوه مهمه اقتصادي پروژه وبلله او ویې ویل، اسلامي امارت د دې پروژې د چارو پر مخ بیولو لپاره قراردادي شرکت ته ټولې لازمې اسانتیاوې برابرې کړې دي. محترم ملا صاحب له قراردادي شرکت څخه وغوښتل چې ژر تر ژره دې د یادې پروژې ساختماني چارې پیل او هغه ستونزې دې هوارې کړي چې د پروژې په کارونو کې د ځنډ لامل ګرځي.
د امسيسي شرکت عمومي رییس وانګ جي چینګ د پروژې په پرمخ بیولو کې د اسلامي امارت همکاري وستایله او ویې ویل، د مس عینک پروژې په اړه په ډېرو برخو کې پرمختګونه شوي او چمتو دي، چې له کانونو او پټرولیم وزارت سره په همغږۍ دغه پروژه پرمخ بوځي.
