الحاج ملا عبدالغني برادر اخوند په هرات ولایت کې د افغانستان د علماوو، قومي مخورو او سوداګرو په جوړه شوې غونډه کې ګډون وکړ

نېټه: 2022، سپټمبر 2مه

د رياست الوزراء اقتصادي مرستيال الحاج ملا عبدالغني برادر اخوند په هرات ولايت کې د افغانستان د علماوو، قومي مخورو، سوداګرو او پانګوالو جوړه شوې غونډه کې د ګډون او وينا په موخه دغه ولايت ته سفر وکړ .

د ریاست الوزراء اقتصادي مرستیال محترم الحاج ملا عبدالغني برادر اخوند د هغو سوداګرو، علماوو او د هرات ولایت له مسؤولینو څخه مننه وکړه، چې یاده غونډه یې ترتیب کړې وه. د رياست الوزراء اقتصادي مرستيال دې جوړې شوې ناستې ته په وينا کې وويل: موږ وتوانېدو چې د بهرنیو اسعارو پر وړاندې افغانۍ باثباته وساتو، په داسې حال کې چې د سیمې باثباته هېوادونه د خپلو اسعارو د ثبات ساتلو په برخه کې پاتې راغلي دي.

د ریاست الوزراء اقتصادي مرستیال زیاته کړه؛ پر افغانستان د اسلامي امارت له بيا واکمنېدو سره د هرات ولايت صنعتکارانو، سوداګرو او پانګوالو ډېری ستونزې حل شوې او کومې، چې پاتې دي هغو ته به هم ژر تر ژره رسېدنه وشي.

 د رياست الوزراء اقتصادي مرستيال په دغه غونډه کې د هرات اوسېدونکو، سوداګرو او پانګوالو ته زيرى ورکړ چې په نږدې راتلونکي کې به د ټاپي پروژې چارې له هرات څخه شروع شي او لومړۍ ګټه به يې هم ددغه ولايت اوسېدونکو ته ورسېږي.

محترم الحاج ملا عبدالغني برادر اخوند وويل، پر ټاپي پروژه سربېره به د هرات ولايت په صنعتي پارک کې د پنځم فاز چارې هم شروع شي، د پل هاشمي په سيمه کې به صنعتي ښارګوټى جوړ او د پاشدان او شنډنډ بندونو کارونه به هم په نږدې راتلونکي کې بيا پيل شي.