ټاپي پروژه؛ راتلونکی پسرلی به یې عملي چارې پيل شي
نېټه: د 2022 کال د مارچ 17مه
د ریاستالوزراء لومړي مرستیال ملا عبدالغني برادر اخوند د ټاپي پروژې له اجرائیوي رئیس محمد مراد امانوف سره وکتل او د هغه پر پيلولو یې ورسره خبرې وکړې. محترم ملاصاحب د ټاپي پروژې د پيل لپاره په افغانستان کې اوسنی رامنځته شوی وضعیت یو ښه فرصت وباله او زیاته یې کړه، اسلامي امارت د یادې پروژې د پيل لپاره پوره چمتووالی لري او په دغه برخه کې هر ډول همکارۍ ته تیار دی.
د ټاپي پروژې اجرائیوي رئیس وویل، د دغه پروژې عملي کارونه به راتلونکی پسرلی له هرات ولایت پيل کړي او د کارونو د چټکتیا په موخه غواړي چې د دواړو هیوادونو لخوا باصلاحیته ټیمونه رامنځته شي. نوموړي زیاته کړه، نړیوال اسلامي بانک، د اسيا پرمختیايي بانک او همدارنګه روسي، چینايي او ځینې عربي بانکونه هم په ټاپي پروژه کې پانګونې ته چمتو دي. ښاغلي مراد امانوف وویل، له ټاپي پروژې سره یوځای به د ټآپ پروژې عملي چارې هم پيل کړي.
