د ریاستالوزراء لومړي مرستیال په افغانستان کې د خصوصي سکتور له استازو سره ولیدل
نېټه: د 2021 کال د ډسمبر 5مه
د افغانستان اسلامي امارت د ریاستالوزراء لومړي مرستیال ملا عبدالغني برادر اخوند پرون د افغانستان خصوصي سکتور له استازو سره په خپل کاري دفتر کې وکتل. محترم ملا برادر اخوند سوداګرو او صنعتکارانو ته ښه راغلاست ووایه او د اسلامي امارت لخوا یې د هر اړخیز ملاتړ ډاډ وکړ.
د سوداګرو او صنعتکارانو په استازولۍ بیا ښاغلي محمد یونس مهمند، خان جان الکوزي، برهان او عصمت الله وردګ له اسلامي امارت څخه د سوداګرۍ او صنعت په برخه کې د رامنځته کړل شویو ګمرکي او ټرانزیټي اسانتیاوو په تړاو مننه وکړه. دوی پر دې سربېره په بانکي سیسټم، د پیسو په لېږد او تجارت کې هم خپلې ستونزې په پوره جزیاتو سره شریکې کړې.
د سوداګرو او صنعتکارانو د ستونزو او وړاندیزونو تر اورېدو وروسته محترم ملا برادر اخوند د افغانستان اسلامي امارت لخوا د خصوصي سکتور اړوند ستونزو د حل په اړه د هر ډول لازمې همکارۍ ډاډ ورکړ او په مجلس کې د اسلامي امارت اړوندو موجودو جهتونو ته یې هدایت وکړ، چې د سوداګرو د ستونزو په حل کولو کې جدي اقدام وکړي.
