د محترم ملا عبدالغني برادر اخوند له لوري د سالنګ لویې لارې تونل او ګالرۍ ګټې اخیستنې ته وسپارل شول
د ریاستالوزراء اقتصادي مرستیال محترم ملا عبدالغني برادر اخوند له لوري د روان لمریز کال د قوس میاشتې په ۲۹مه نېټه د سالنګ لویې لارې تونل او ګالرۍ ګټې اخیستنې ته وسپارل شول. په دغو مراسمو کې د ټولګتو وزارت سرپرست ملا محمد عیسی ثاني، د خصوصي سکټور استازو او یوشمېر امارتي مسوولینو هم حضور درلود. د ریاستالوزراء اقتصادي مرستیال محترم ملا عبدالغني برادر اخوند په همدې مناسبت جوړ شوو مراسمو ته د خپلو خبرو پر مهال وویل: «یو ملت په اقتصادي لحاظ هغه مهال پر پښو درېږي او د خودکفایۍ پر لور ګامونه اخلي کله چې سالمه زېربنا ولري. زموږ د هېواد زېربنا د تېرو څلوېښتو کلونو د جګړو له امله سخته صدمه لیدلې ده. د اقتصاد د اساساتو رغولو اهمیت اسلامي امارت درک کړی دی، ځکه یې د اقتصادي پالیسۍ مهمه برخه ګرځېدلې ده». محترم ملا صاحب زیاته کړه، څه موده وړاندې دوی په همدې سیمه کې د سالنګ لارې د اساسي بیارغونې د کار د پيل افتتاح درلوده، ډېر وحت نه دی تېر شوی چې نن یې د ځینو اساسي برخو لکه تونل، ګالریو او نورو ساحو د کار د پوره کېدو او ګټې اخیستنې ته د سپارلو پرانیسته کوي. د محترم ملا صاحب په خبره، دا برخې په داسې اساسي ډول د افغان انجنیرانو له لوري رغول شوې دي چې په تېرو شلو کلونو کې یې ساری نه دی لیدل شوی. محترم ملا عبدالغني برادر اخوند د سالنګ لویې لارې اهمیت ته په اشارې سره وویل، د دې لارې اهمیت په دې کې دی چې د هېواد د شمال او جنوب د نښلولو ترڅنګ د جنوبي او منځنۍ اسیا هېوادونو له پاره د ترانزیټ په برخه کې مهم رول لوبوي، د ګاونډيو هېوادونو د تجارتي توکو په لېږد رالېږد کې به ډېرې اسانتیاوې رامنځته او له دې لارې به د سوداګریزې راکړې ورکړې حجم زیات شي. د ریاستالوزراء اقتصادي مرستیال هېوادوالو ته د سالنګ لویې لارې څخه د تېرېدو پر مهال د لا نورو اسانتیاوو برابرولو او همدارنګه د سوداګرۍ او ترانزیټ کچې د زیاتېدو په اړه وویل، اسلامي امارت په پام کې لري چې د امکاناتو په برابرېدو سره د سالنګ دوهم تونل هم وباسي او له حیرتان څخه تورخم ته د اوسپنې پټلۍ وغځوي، چې په دې سره به په ترانزیټ کې زیاتوالی او هېوادوالو ته به بې شمېره اسانتیاوې رامنځته شي. محترم ملا صاحب په وخت او ښه کیفیت سره د سالنګ لویې لارې د تونل او ګالریو د اساسي بیارغونې له امله د ټولګټو وزارت، قراردادي خصوصي شرکتونو او انجنیرانو له مخلصانه هڅو مننه کوم او ملت ته زېری ورکوم چې سر له نن ورځې دغه لویه لار د هر ډول تګ راتګ له پاره چمتو ده. د ریاستالوزراء اقتصادي مرستیال ملت ته ډاډ ورکړ چې اسلامي امارت په پوره اخلاص او صداقت سره د هېواد د آبادۍ لپاره هڅې کوي او ټولې کړې ژمنې به په عمل کې ثابتې کړي. محترم ملا صاحب له ټولو افغانانو وغوښتل څو د اسلامي امارت کلک ملاتړ وکړي. د یادولو وړ ده چې د سالنګ لویې لارې د تونلونو او ګالریو اساسي بیارغونه د افغانستان اسلامي امارت په ملاتړ د خصوصي سکټور له لوري له ټاکل شوي وخت مخکې په ښه کیفیت سره بشپړه او نن د هر ډول تګ راتګ په موخه ګټې اخیستنې ته وسپارل شوه.
