د محترم ملا عبدالغني برادر اخوند په حضور کې د کانونو او پټرولیم وزارت او ګټونکو شرکتونو ترمنځ د ۶.۵ میلیارد ډالرو په پانګونې سره د ۷ لویو کانونو قراردادونه لاسلیک شول

د ریاست‌الوزراء اقتصادي مرستیال محترم ملا عبدالغني برادر اخوند په حضور کې نن پنجشنبه د روان لمریز کال د وږي میاشتې په ۹مه نېټه د کانونو او پټرولیم وزارت او ګټونکو شرکتونو ترمنځ د ۶.۵ میلیارد ډالرو په پانګونې سره د ۷ لویو کانونو قراردادونه لاسلیک شول. په دغو قراردادونو کې د هرات ولایت د غوریانو ولسوالۍ د اوسپنې کان څلور بلاکونه شامل دي، چې وطن درخشان شرکت ته چې آذاران صنعتي سازه ایراني شرکت یې ونډوال دی د لومړي بلاک؛ ساحل شرق میانه شرکت ته چې دره نور افغاني او ايپکول ترکي شرکتونه یې ونډوال دي د دوهم بلاک؛ شمش ملي شرکت ته چې GBM او AD Resources انګليساتي شرکتونه یې ونډوال دي د درېیم بلاک؛ باختر فولاد شرکت ته چې احیای سپاهان او پارسیان ایراني شرکتونه یې ونډوال دي د څلورم بلاک؛ افغان انوېسټ شرکت ته د غور ولایت د تولک ولسوالۍ د سرپو او جستو کان د یو بلاک؛ چینا-افغانستان شرکت ته چې افغانستان زړور شرکت یې ونډوال دی د تخار ولایت د چاه آب ولسوالۍ د سمتي سرو زرو کان او توریا خصوصي شرکت ته د لوګر ولایت د دوهم مس عینک کان قراردادونه ورکړل شول. د یادولو وړ ده چې د یادو ۷ قراردادونو د چارو ترسره کولو لپاره په مجموعي ډول ۶ میلیارده او ۵۵۷ میلیونه ډالره پانګونه کېږي، چې زرګونو کسانو ته به کاري زمینه مساعده او د هېواد په اقتصادي وضعیت کې به د پام وړ ښه والی ورسره راشي. ان شاءالله