محترم ملا عبدالغني برادر اخوند د ترکیې له سفیر سره وکتل
د ریاستالوزراء اقتصادي مرستیال محترم ملا عبدالغني برادر اخوند نن (پنجشنبه) د ۱۴۰۵ کال د سنبلې میاشتې په ۱۹مه نېټه په خپل کاري دفتر کې د افغانستان لپاره د ترکیې له سفیر، ښاغلي سادین آیلدز، سره ولیدل. د دې لیدنې پرمهال د دواړو هېوادونو ترمنځ د اقتصادي، سوداګریزو او ترانزیټي اړیکو پر پراختیا او همداراز په ترکیه کې د افغان کډوالو د ستونزو پر حل خبرې وشوې.
د ریاستالوزراء اقتصادي مرستیال د هغو ترکي شرکتونو له فعالیتونو ستاینه وکړه، چې په افغانستان کې یې په بېلابېلو برخو کې پانګونه کړې ده. محترم ملا عبدالغني برادر اخوند له نورو ترکي پانګوالو هم وغوښتل چې په افغانستان کې پانګونه وکړي او د افغانستان اسلامي امارت به ورته ټولې اسانتیاوې برابرې کړي. د ریاست الوزراء اقتصادي مرستیال په ترکیه کې د افغان کډوالو د ستونزو پر حل او هغوی ته د اسانتیاوو پر رامنځته کولو هم ټینګار وکړ.
د ترکیې سفیر سادین آیلدز په خپلو خبرو کې خوښي څرګنده کړه، چې د افغانستان او ترکیې ترمنځ د سوداګرۍ کچه زیاته شوې ده. هغه وویل، چمتو دي چې د ترانسپورټ، ترانزیټ، روغتیا، زده کړو او نورو اقتصادي برخو کې له افغانستان سره خپلې اړیکې لا پراخه کړي. نوموړي وویل، ترکیه به د افغانستان او نړیوالې ټولنې ترمنځ د اړیکو پراختیا او نړۍ ته د افغانستان د ریښتیني تصویر وړاندې کولو په برخه کې خپلو همکاریو ته دوام ورکړي. د ترکیې سفیر همداراز وویل، چې افغانانو ته یې د ویزو ورکړه کې اسانتیا رامنځته کړې او هڅه به وکړي چې په دې برخه کې لا نور سهولتونه هم برابر کړي.
