د حیرتان بندر اړوند نایب آباد سټېشن کې پر نړیوالو معیارونو برابر سوداګریز مرکز جوړېږي
د پانګونې بینالوزارتي کمېټې نوبتي غونډې ته چې د روان ۱۴۰۳ لمریز کال د غبرګولي میاشتې په لومړۍ نېټه په مرمرینه ماڼۍ کې جوړه شوې وه، د خصوصي سکټور له لوري د حیرتان بندر اړوند نایب آباد سټېشن کې پر نړیوالو معیارونو د برابر سوداګریز مرکز، جلال آباد ښار کې د سوداګریز مارکېټ جوړولو او یوشمېر نورو برخو کې د پانګونې طرحې د بحث لپاره وړاندې شوې. په دغه غونډه کې د خصوصي سکټور له لوري د حیرتان بندر د نایب اباد سټېشن د پراختیا او هلته د لوجستیکي مرکز د جوړولو پر موضوع تفصیلي بحث وشو. همداراز په یاده غونډه کې تر هراړخیز بحث وروسته د جلال آباد ښار وچ ډنډ ساحه کې د ښاروالۍ پر ځمکه د شپږ پوړیز سوداګریز مارکېټ جوړولو طرحه تایید او د منظورۍ لپاره اقتصادي کمېسیون ته واستول شوه. د دغه طرحې له مخې به خصوصي سکټور د ۲۶۹ میلیونو افغانیو په پانګونې سره اووه پوړیز سوداګریز مارکېټ جوړوي، چې ټولټال پکې ۵۰۶ دوکانونه په پام کې نیول شوي.
