محترم ملا عبدالغني برادر اخوند د کابل ولایت د ارغندۍ سبسټېشن د پاتې چارو د پيل پرانیسته وکړه
د ریاستالوزراء اقتصادي مرستیال محترم ملا عبدالغني برادر اخوند له لوري د روان ۱۴۰۳ لمریز کال د چنګاښ میاشتې په اوومه نېټه د ارغندۍ سب سټېشن د پاتې چارو د پیل پرانیسته وشوه. په هغو مراسمو کې چې له همدې امله د کابل په ارغندۍ سیمه کې جوړ شوي وو، د اسلامي امارت مسوولینو، د خصوصي سکټور استازو او د سیمې یوشمیر اوسېدونکو هم ګډون کړی و. د یادونې وړ ده، چې دا سب سټېشن د بغلان له خواجه الوان دښتې څخه د کابل تر ارغندۍ سیمې پورې د ترکمنستان برېښنا د لېږد له پاره جوړېږي، چې لګښت یې اته میلیونه او شپږ سوه زره ډالره اټکل شوی دی. د پروژې کارونه به د شاوخوا دوه کلونو په جریان کې بشپړ شي، چې د کابل په ګډون به د غزني، پکتیا، خوست او ننګرهار ولایتونو شاوخوا څلور سوه زره کورنۍ له برېښنا څخه برخمنې شي. دغه راز د برېښنا د کمښت ستونزه به تر یوه بریده راکمه او ورسره به د صنعت په برخه کې پرمختګ رامنځته شي.
