د جنوبي افریقا یوشمېر پانګوالو، علماوو او د روغتیا برخې متخصصینو د ریاست الوزراء له اقتصادي مرستیال سره وکتل
د جنوبي افریقا یوشمېر پانګوالو، علماوو او د روغتیا برخې متخصصینو د روان ۱۴۰۳ لمریز کال د سرطان میاشتې په څلورمه نېټه د ریاستالوزراء له اقتصادي مرستیال محترم ملا عبدالغني برادر اخوند سره وکتل. د دغه لیدنې پر مهال د جنوبي افریقا پانګوالو په افغانستان کې د پانګونې په برخه کې له رامنځته شوو فرصتونو څخه په استفادې د کانونو په سکټور کې پانګونې ته لېوالتیا وښوده او زیاته یې کړه، چې دوی به د پرمختللې ټکنالوژۍ په مرسته کانونه استخراج او پروسس کړي. همدا راز د دغه هېواد د روغتیا برخې متخصصینو وویل، دوی د افغانستان له عامې روغتیا وزارت سره په همغږۍ غواړي چې په افغانستان کې د روغتیا سکټور د ملاتړ په موخه یو معیاري او مجهز روغتون جوړ کړي، څو افغانانو ته په ښه ډول روغتیايي خدمتونه وړاندې شي. ورپسې د ریاستالوزراء اقتصادي مرستیال محترم ملا عبدالغني برادر اخوند د جنوبي افریقا پانګوالو، علماوو او د روغتیا برخې متخصصینو ته د هر ډول همکارۍ او ملاتړ ډاډ ورکړ او ویې ویل، چې اوسمهال په افغانستان کې د پانګونې لپاره ښه زمینه برابره شوې او ټول کورني او بهرني پانګوال کولای شي له دې فرصت څخه استفاده وکړي.
