ملا عبدالغني برادر اخوند؛ په پيروزي ښارګوټي کې د «۲۱۶» میلیونو ډالرو په ارزښت د صنعتي پارک جوړولو پرانیسته وکړه
نېټه: د 2022 کال د اپریل 28مه
د رياستالوزراء د لومړي مرستيال ملا عبدالغني برادر اخوند په حضور کې نن د ښارجوړونې وزارت او د بيجينګ-ننګرهار ساختماني او توليدي شرکت تر منځ د پيروزي ښارګوټي په ختيځه برخه کې د صنعتي پارک سپارلو تړون لاسليک او د پرانيستې مراسم يې ترسره شول.
په دغه صنعتي پارک کې به چې «۲۱۶» ميليونه ډالره لګښت پرې راځي؛ «۱۵۰» کارخونې جوړېږي چې «۱۳۶۰۰» هيوادوالو ته به دايمي او «۳۰۰۰۰» نورو کسانو ته به په غير مستقيم ډول د کار زمينه برابره کړي.
د يادولو وړ ده چې په پيروزي ښارګوټي کې پر ياد صنعتي پارک سربېره؛ ښوونيز مرکزونه، سوداګريز او د هستوګنې بلاکونه، شنې ساحې، مسجدونه او تفريحي پارکونه هم شامل دي.
