اقتصادي کمېسیون؛ له DP World کمپنۍ سره د افغانستان د بندرونو د عصري کولو په موخه د تفاهم پرېکړه وکړه
نېټه: 2022 کال، جون 6
د ریاستالوزراء د اقتصادي مرستیال ملا عبدالغني برادر اخوند په مشرۍ د اقتصادي کمېسیون په 21مه غونډه کې تر مفصل بحث وروسته، کابل ښاروالۍ ته سپارښتنه وشوه، څو هغه شپږ مشارکتي پروژې چې ښاروالۍ یې د اقتصادي کمېسیون له لوري د ابتدايي منظورۍ غوښتنه کوي، ازادې داوطلبۍ ته وسپاري.
اقتصادي کمېسیون همدارنګه له DP World کمپنۍ سره د افغانستان د بندرونو د عصري کولو او د افغانستان د صادراتو لپاره د آسانتياوو په موخه د تفاهم پرېکړه وکړه. د یادولو وړ ده چې څو ورځې مخکې هم د ملا عبدالغني برادر اخوند په مشرۍ یو لوړ پوړي دولتي پلاوي په متحده عربي اماراتو کې د یادې کمپنۍ له اجرائیه رئیس سره ناسته درلوده.
د اقتصادي کمېسیون په یاده غونډه کې د افغانستان د اوسپنې پټلۍ ادارې ته اجازه ورکړل شوه څو د حیرتان پټلۍ د خدماتو پروژه د نوي قرارداد په موخه داوطلبۍ ته وړاندې کړي.
د اوسپنې پټلۍ اداره وايي چې د حیرتان اوسپنې پټلۍ پروژې بشپړ مسؤلیت باید افغان لوری ولري او د خدماتو وړاندې کولو لپاره به له بل شرکت سره قرارداد کېږي.
