په کابل کې د ملت سوداګریز او په لښکرګاه کې د هستوګنیزو اپارتمانونو جوړولو طرحې تایید شوې
د پانګونې بینالوزارتي کمېټې نوبتي ناسته په مرمرینه ماڼۍ کې ترسره او له اجنډا سره سم د پانګونې وړاندې شوو طرحو په اړه هراړخیز بحث وشو. یادې ناستې ته د خصوصي سکټور له لوري په مزارشریف ښار کې د اطلاعاتو او فرهنګ وزارت پر ځمکه د سوداګریز مارکېټ او د کابل ښار د څلورمې ناحیې اړوند تایمني سیمه کې د راه ابریشم هستوګنیز او سوداګریز ښارګوټي د جوړولو طرحې وړاندې شوې. تر مفصل بحث وروسته ټاکل شویو کمېټو ته دنده وسپارل شوه، څو د یادو طرحو تخنیکي او اقتصادي ارزونه ترسره او راپور یې د پانګونې بین الوزارتي کمېټې راتلونکې ناستې ته وړاندې کړي. دغه راز یادې ناستې ته په کوټې سنګي سیمه کې د ملت سوداګریز مارکېټ او د هلمند ولایت په لښکرګاه ښار کې د سوداګریز مرکز او هستوګنیزو اپارتمانونو جوړولو طرحو د ارزونې لپاره د ټاکل شوو کمېټو له لوري راپورونه وړاندې شول، چې تر مفصل بحث وروسته د یادو مارکېټونو د جوړولو طرحې تائید او د منظورۍ په موخه اقتصادي کمېسیون ته واستول شوې.
